"Business Insight” (BI) beynəlxalq tədqiqat şirkətinin 734 respondent arasında apardığı sorğu çərçivəsində Bakı şəhərində personal kompüteri olan və internetdən istifadə edən əhali sayının xeyli artdığı müəyyən olunub. Araşdırmanın yekunları üzrə BI tərəfindən təqdim olunan hesabata əsasən, Bakı əhalisinin 81 faizi internet istifadəçisidir. Ötən il bu rəqəm 41 faiz olub.

Tədqiqat onu göstərir ki, bu cür artım ölkədə internet tariflərinin azalması ilə bağlıdır.

Əhalinin 61,7 faizinin isə evində personal kompüter var. Paytaxtın internet-istifadəçilərinin əksər hissəsi - 13,9 faizi "Adanet” provayderinin xidmətlərindən istifadə edir. "Adanet”dən sonra Bakıda istifadə olunan provayderlər siyahısında "Azeronline” (13,8 faiz), "Connect” (8,2 faiz) və digər şirkətlər gəlir. Bakı istifadəçisinin orta yaş həddi 33-dür.