Sentyabrın 4-ü gecə saatlarında Ermənistan silahlı qüvvələrinin cəbhənin Tərtər rayonunun Çiləbürt kəndi yaxınlığında Azərbaycan Ordusunun mövqelərinə doğru qəfil hücuma keçməsi nəticəsində şəhid olmuş iki hərbçimizdən biri artıq torpağa tapşırılıb. ANS-in məlumatına görə, 34 yaşlı Əhməd Abdullayev doğulduğu Cəlilabad rayonunda dəfn edilib. Dəfn mərasimində hərbçinin yaxınları ilə yanaşı hərbçi dostları da iştirak edib.

Şəhid Əhməd Abdullayevin körpə yaşlarından hərbçiliyə həvəsinin olduğunu deyən atası Hüseynağa Abdullayev oğlunun yoldaşlarını xilas edərkən qəhrəmancasına şəhid olmasından qurur duyduğunu buldirib: "Biz Vətənin quluyuq. Mən oğlumu 15 yaşından Vətənə qulluq eləməyə göndərmişəm. Vətənə qulluq edən şəhid də olmalıdır".

Xatırladaq ki, sentyabrın 4-də gecə saatlarıənda Ermənistan silahlı qüvvələri cəbhənin Tərtər istiqamətində - Çiləbürt kəndi yaxınlığında Azərbaycan Ordusunun mövqelərinə doğru qəfil hücuma keçib. Döyüş təmas xəttində daha gərgin şəkil alıb. Atışma zamanı Azərbaycan tərəfdən iki hərbçi şəhid olub. Bunlar milli ordumuzun hərbçiləri Əhməd Hüseynağa oğlu Abdullayev və Fərid Gülağa oğlu Əhmədovdur. F. Əhmədov ermənilərə yaxın təmas xəttində şəhid olub. Ehtimala görə qarşı tərəf meyiti götürə bilib.

Qeyd edək ki, Əhməd Abdullayev öz hərbçi qrupunu düşmən atəşindən xilas edən zaman qəhrəmancasına şəhid olub.