Xalq artisti Aygün Kazımovanın sevə-sevə oxuduğu "Ad günü” mahnısını dinləyicilər artıq Ayaz Qasımovun da ifasında eşidir. ANS PRESS-in məlumatına görə, mahnını gənc müğənninin ifa etməsini mahnının müəllifi- bəstəkar Aygün Səmədzadə özü istəyib.

"Aygün Kazımovanın mənim müəllif konsertimdə iştirak etməməsi xoşuma gəlmədi və "Ad günü” mahnısını Ayaz Qasımova verməklə onu cəzalandırdım", deyə bəstəkar A. Səmədzadə ANS PRESS-ə açıqlamasında bildirib.

Bəstəkar, Aygün Kazımovaya mahnını ifa etməyə qadağa qoyduğu barədə gəzən şayiələri də təkzib edib: "Aygün Kazımovaya qadağa qoymamışam. İstəyirsə oxusun, özü bilər. Düzdür, Aygün Kazımova mahnını pis ifa etməmişdi. Amma mənə görə mahnı Ayazın ifasında daha gözəl səslənir”.

Aygün Səmədzadə müğənninin tanınmış və ya gənc olmasının onun üçün rol oynamadığını deyib: "Əslində mənim adım, mənim bəstəmi ifa etmək həmin müğənniyə şöhrət gətirə bilər. Bu baxımdan da mahnılarımı özüm istədiyim sənətçiyə verirəm. Mənə görə mahnının gözəl ifa olunması əsasdır”.